புலியாட்டம்

தெருக்கூத்து, தோற்பாவை நிழற்கூத்து, பொய்க்கால் குதிரை ஆட்டம் போன்ற தமிழ்நாட்டு நாட்டாற்கலை வடிவங்கள் நிகழ்கலைகளாக விளங்குகின்றன. ஊர்வலங்களிலும், உற்சவங்களிலும், ஆன்மீக, சமூக விழாக்களிலும், மொகரம், ஓணம் பண்டிகைகளிலும் நிகழ்த்தப்படும் ‘புலியாட்டம்’ ஒரு நிகழ்கலைதான்.

நிகழ்கலை என்பது ஒருவரோ, ஒரு குழுவினரோ பிறருக்காக பாடியோ, ஆடியோ, நடித்தோ, சொல்லியோ காட்டுவது. பிறருக்கு நிகழ்த்திக் காட்டுவதால் நிகழ்த்துதல் என்று பெயர் பெற்றது.

புலிபோல வேடமிட்டு ஆடுவதைப் புலியாட்டம், புலிவேஷ ஆட்டம் என்று அழைப்பார்கள். தமிழகத்தின் அனைத்துப்பகுதிகளிலும் புலியாட்ட நிகழ்ச்சிகல் நடத்தப்படுகிறன. புலியாட்டம் சாதி, சமய, இன, மொழி எல்லை ஆகியவற்றை கடந்து ஆடப்படும் ஆட்டம்.

புலி பற்றிய அறிவும், புலியின் இயல்பும் புலியாட்டத்தை ஆடுபவனுக்கு தெரிந்திருக்க வேண்டும். ஏனெனில், மனிதனின் ஆட்டத்தை மனிதன் பார்த்து ஆடும் ஆட்டமல்ல; புலியின் இயல்பை மனிதன் கற்று ஆடப்படும் ஆட்டம்.

புலியாட்டக்காரர் புலியின் செய்கைகளை, இயல்புகளை தன் கைகளின் அசைவுகளாலும், முகபாவத்தாலும் வெளிப்படுத்தித் தன்னை ஒரு புலியாக பார்ப்பவர் உள்ளங்களில் நிலை நிறுத்துவார்.

புலி போல உறுமிக்கொண்டு பதுங்கியும், அங்கும் இங்கும் பாய்ந்தும் ஆடும் ஆட்டம் பயத்தை உண்டாக்கினாலும் ரசிக்ககூடியதாக இருக்கும். சிறுவர்களை அதிகம் கவரும். தரையோடு தரையாக பதுங்குவது, ஒளிவது, உடம்பையும் பாதங்களையும் நக்குவது போன்ற அசைவுகளை மேலத்தாளத்திற்கு ஏற்ப செய்து காட்டுவார்கள்.

புலியாட்டம் சிலம்பாட்டத்துடன் கலந்து ஆடும் பழக்கமும் உள்ளது. ஒன்று முதல் நான்கு வரை உள்ள சிலம்பாட்ட அடிகள் அப்படியே புலியாட்டத்தில் இடம் பெறுகின்றன. அதனால் தான் சிலம்பாட்டத்திற்குரிய பக்க இசை அப்படியே புலி ஆட்டத்திற்கும் பொருந்துகிறது. புலி ஆட்ட கலைஞரும், சிலம்பாட்ட கலைஞரும் உபயோகிக்கும் கால் வைப்பு முறைகளும் ஒன்றாகவே இருக்கும். புலியின் மிக மெதுவான பம்முதலையும் மிக விரைந்த பாய்ச்சலையும் இந்த கால் வைப்பு முறை பிரதிபலிக்கிறது.

புலிக்கு இரட்டை வால் இல்லை. ஆனால் புலிவேடம் போடும் கலைஞர்களில் சிலர் இரட்டைவால் கட்டும் பழக்கம் தென் தமிழகத்தில் உள்ளது. ஒருவர் இரட்டை வால் கட்டினால் தன்னை எதிர்க்க யாருமில்லை என்று சவால் விடுவதாக பொருள். இரட்டை வால் கட்டி வருவோருக்கு பல சோதனைகள் வைக்கப்படும். அவற்றில் வெற்றி பெறுபவரே இரடைவால் கட்டத் தகுதியுடையவர்கள் என ஏற்றுக்கொள்ளப்படுவார்கள்.

சேலம் பகுதிகளில் உள்ள புலி ஆட்டக்கலைஞர்கள் பக்க இசையில் வாசிக்கப்படும் தாளப்போக்கிற்கேற்ப ஆடுவார்கள். பெரும்பாலும் சிலம்பாட்ட கால்வைப்பு முறைகளையே பின்பற்றுவார்கள். சென்னைப்பகுதிகளில் உள்ள கலைஞர்கள் புலியின் செயல்களைப்போலவே அதிகம் செய்வார்கள். தாக்க வருபவரை அடித்து குதறுதல் போன்ற செயல்களை செய்வார்கள். தமிழகத்தின் பெரும்பாலான பகுதிகளில் உள்ள கலைஞர்கள் முதலில் தரையைத் தொட்டு வணங்கி பின்பு ஆட்டத்தை தொடங்குவார்கள்.

புலிவேடம் போட நாமக்கட்டியை நீரில் குழைத்து உடல் முழுவதும் பூசிக்கொள்வார்கள். அது உலர்ந்தபின் அதன் மேல் பிற வண்ணங்களைப் பூசுவர். வேறு சிலர், முதல் நாள் வடித்த அரிசிக்கஞ்சியில் கருவேல மரப்பிசினை கலந்து ஊறவைத்து அதில் வண்ணங்களை குழைத்து பூசிக்கொள்வர். புலி வேடத்திற்கு வண்ணம் பூச பிரத்யேக ஒப்பனைக்காரர்கள் இருக்கிறார்கள். சில நேரங்களில் புலி வேடக்காரர்களே ஒருவருக்கொருவர் ஒப்பனை செய்து கொள்வதும் உண்டு. இந்த வேலைக்கு பல மணிநேரங்கள் கூட ஆகும். புலியின் உடல் வண்ணங்களை போலவே மஞ்சள் நிறமும் கருப்பு வரிகளும் தீட்டப்படும்.

கலையிலிருந்து தான் சினிமா தோன்றியிருந்தாலும், சினிமாக்களில் புலியாட்டத்தையும் புலியாட்ட கலைஞர்களையும் சிறப்பாக காட்டியதில்லை. வெகுசில படங்களில் மட்டுமே பாடல்காட்சிகளில் புலியாட்டத்தைக் காட்டுகிறார்கள்.

கலையை ரசிப்பதுபோல கலைஞர்களின் வாழ்வை ரசிக்க முடியாது. சமீப காலங்களில் நாட்டுப்புற கலைகள் பரவலாக நலிந்து வருகின்றன. இதற்கு புலியாட்டமும் விதிவிலக்கல்ல. இக்கலைக்கே உயிர்ப்பாக விளங்கும் புலிகளும் நம் நாட்டில் குறைந்து வருகின்றன. புலிகளையும் புலியாட்டத்தையும், புலியாட்ட கலைஞர்களையும் அழிவிலிருந்து மீட்க வேண்டியது நம் கட்டாயக் கடமைகளில் ஒன்று.

சமீபக்காலங்களில் இளைஞர்கள் குறும்படங்களை இயக்குவது அதிகமாகி வருகிறது. அத்தகைய இளைஞர்கள் நாட்டுப்புற கலைஞர்களுடன் இணைந்து குறும்படங்களையும் ஆவணப்படங்களையும் எடுக்க முன்வரவேண்டும். சமூக விழாக்களிலும், ஆன்மீக விழாக்களிலும் புலியாட்டக் கலைஞர்களை வரவழைத்து ஆட செய்து அவர்களை கௌரவப்படுத்த வேண்டும்; அவற்றை காணும் இந்த தலைமுறைக் குழந்தைகளுக்கும் புதிய வகை பொழுதுபோக்காக இருக்கும்.

– முருகராஜ்

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s